ਕੇਂਦਰ ਨੇ ਪੰਜਾਬ ਤੋਂ ਹਲਵਾਰਾ ਏਅਰਪੋਰਟ ਦਾ ਨਿਯੰਤਰਣ ਮੰਗਿਆ, ਉਡਾਣਾਂ ਸ਼ੁਰੂ ਕਰਨ ਦੀ ਤਿਆਰੀ
 |
| ਹਲਵਾਰਾ ਹਵਾਈ ਅੱਡਾ |
ਹਲਵਾਰਾ ਏਅਰਬੇਸ 'ਤੇ ਬਣ ਰਿਹਾ ਨਵਾਂ ਅੰਤਰਰਾਸ਼ਟਰੀ ਏਅਰਪੋਰਟ "ਹਲਵਾਰਾ ਏਅਰਪੋਰਟ" ਨਾਂਅ ਨਾਲ ਜਾਣਿਆ ਜਾਵੇਗਾ। ਉਡਾਣਾਂ ਸ਼ੁਰੂ ਕਰਨ ਤੋਂ ਪਹਿਲਾਂ ਲੋੜੀਂਦੇ ਏਅਰਪੋਰਟ ਕੋਡ ਦੀ ਮਨਜ਼ੂਰੀ ਹਲਵਾਰਾ ਏਅਰਬੇਸ ਨੂੰ ਮਿਲ ਗਈ ਹੈ। ਕੇਂਦਰ ਨੇ ਪੰਜਾਬ ਸਰਕਾਰ ਨੂੰ ਕਿਹਾ ਹੈ ਕਿ ਨਵੇਂ ਸਿਵਲ ਏਅਰਪੋਰਟ ਟਰਮੀਨਲ ਦਾ ਨਿਯੰਤਰਣ ਪੂਰੀ ਤਰ੍ਹਾਂ ਹਵਾਲੇ ਕਰ ਦਿੱਤਾ ਜਾਵੇ ਤਾਂ ਜੋ ਇਸ ਨੂੰ ਚਲਾਇਆ ਜਾ ਸਕੇ।
ਏਅਰਲਾਈਨਾਂ ਦੇ ਓਪਰੇਸ਼ਨ ਲਈ ਬੋਲੀ ਪ੍ਰਕਿਰਿਆ ਵੀ ਜਲਦ ਹੀ ਸ਼ੁਰੂ ਕੀਤੀ ਜਾਵੇਗੀ। ਸੂਤਰਾਂ ਮੁਤਾਬਿਕ, ਇੱਥੋਂ ਵਪਾਰਕ ਉਡਾਣਾਂ ਸ਼ੁਰੂ ਹੋਣ ਵਿੱਚ ਕੁਝ ਮਹੀਨੇ ਲੱਗ ਸਕਦੇ ਹਨ। ਏਅਰ ਇੰਡੀਆ ਪਹਿਲਾਂ ਹੀ ਐਲਾਨ ਕਰ ਚੁੱਕੀ ਹੈ ਕਿ ਜਿਵੇਂ ਹੀ ਏਅਰਪੋਰਟ ਚਾਲੂ ਹੋਵੇਗਾ ਉਹਨਾਂ ਵਲੋਂ ਲੁਧਿਆਣਾ ਤੋਂ ਉਡਾਣਾਂ ਸ਼ੁਰੂ ਕਰਨ ਦੀ ਯੋਜਨਾ ਹੈ।
ਇਹ ਇਸ ਲਈ ਮਹੱਤਵਪੂਰਨ ਹੈ ਕਿਉਂਕਿ ਰਨਵੇਅ ਦੇ ਨਵੀਨੀਕਰਣ ਦੇ ਕੰਮ ਨੂੰ ਛੱਡ ਕੇ ਹਵਾਈ ਅੱਡਾ ਤਕਰੀਬਨ ਤਿਆਰ ਹੈ। ਨਵੀਨੀਕਰਣ ਦਾ ਕੰਮ ਵੀ ਬੜੀ ਤੇਜੀ ਨਾਲ ਜਾਰੀ ਹੈ। ਭਾਰਤੀ ਹਵਾਈ ਸੈਨਾ (IAF) ਅਤੇ ਰਾਜ ਸਰਕਾਰ ਨੇ ਲਗਭਗ ਸਾਰੇ ਕੰਮ ਪੂਰੇ ਕਰ ਦਿੱਤੇ ਹਨ।
ਏਅਰਪੋਰਟ ਅਥਾਰਟੀ ਆਫ ਇੰਡੀਆ (AAI) ਦੇ ਇਕ ਉੱਚ ਅਧਿਕਾਰੀ ਮੁਤਾਬਿਕ ਭਾਰਤੀ ਹਵਾਈ ਸੈਨਾ (IAF) ਸਟੇਸ਼ਨ, ਹਲਵਾਰਾ ਲਈ ICAO ਕੋਡ 'VIHX' ਜਾਰੀ ਕੀਤਾ ਗਿਆ ਹੈ। AAI ਮੁਤਾਬਿਕ ਏਅਰਪੋਰਟ ਤੋਂ ਉਡਾਣ ਦੇ ਸ਼ੁਰੂ ਕਰਨ ਦੀ ਮਿਤੀ ਤਦ ਹੀ ਨਿਰਧਾਰਤ ਹੋ ਸਕੇਗੀ ਜਦੋਂ ਟਰਮੀਨਲ ਦੀ ਇਮਾਰਤ ਮੁਕੰਮਲ ਹੋ ਕੇ ਪੰਜਾਬ ਸਰਕਾਰ ਵੱਲੋਂ AAI ਨੂੰ ਅਧਿਕਾਰਤ ਤੌਰ 'ਤੇ ਹਵਾਲੇ ਕਰ ਦਿੱਤੀ ਜਾਵੇਗੀ।
ਲੁਧਿਆਣਾ ਦੇ ਡਿਪਟੀ ਕਮਿਸ਼ਨਰ ਜੀਤੇੰਦਰ ਜੋਰਵਾਲ ਨੇ ਪਬਲਿਕ ਵਰਕਸ ਡਿਪਾਰਟਮੈਂਟ (PWD) ਨੂੰ ਨਵੀਂ ਟਰਮੀਨਲ ਬਿਲਡਿੰਗ ਤੁਰੰਤ AAI ਨੂੰ ਹਵਾਲੇ ਕਰਨ ਲਈ ਕਿਹਾ ਹੈ ਤਾਂ ਜੋ ਹਵਾਈ ਅੱਡਾ ਚਾਲੂ ਹੋ ਸਕੇ। ਹਵਾਈ ਅੱਡੇ ਦੇ ਅੰਦਰ Taxi-A, Taxi-D ਅਤੇ ਨਵੇਂ ਲਿੰਕ ਟੈਕਸੀ ਦੀ ਨਵੀਨੀਕਰਣ ਦਾ ਕੰਮ ਲਗਭਗ ਮੁਕੰਮਲ ਹੋ ਚੁੱਕਾ ਹੈ। ਮੌਜੂਦਾ ਉਡੀਕ ਰਨਵੇਅ ਦੀ ਓਵਰਲੇਅ ਦਾ ਕੰਮ ਚੱਲ ਰਿਹਾ ਹੈ ਜੋ ਮਾਰਚ 31 ਤੱਕ ਪੂਰਾ ਹੋਣ ਦੀ ਉਮੀਦ ਹੈ।
